Apiñón Bistró

Direición: Julia de la Riva, 5. Avilés

Teléfonu: 984 390 398

Recomendaciones: Tapea y esfruta

https://www.facebook.com/apinontapas

Calidá: 3/5
Preciu: 30€

Comentarios:  Apiñón Bistró ye un local de recién apertura n'Avilés pa dir tapear productos "distintos" d'una forma informal. Platos orixinales, con presentaciones bien cuidaes y bona atención.

Ta asitiáu nel centru d'Avilés, dispon d'una bona terraza onde vos encamentamos comer siempres que podáis. Dientro, el local ye pequenu, tien una decoración prestosa estremada en dos partes, con meses altes pa tomase un vinu o una pequeña, con unes 6 meses bastante apetiguñaes pa sentase a comer.

La sensación según te sientes ye d'un pocu d'aforfugu polo cerca que ta la xente, pero la verdá ye que cenamos bien a gustu y ensin nengún problema.

La idea ye dir a tapear, esfrutar y probar coses nueves. Pero nun pudimos resistinos a entamar  la cena con un Besito de Rey Silu (recién ganador de la medaya d'oru a los quesos de vaca nueva d'España nel Salón Gourmet celebráu en Madrid). Una maravía de quesu, anque, siendo un pocu malos, lo de "Besito" igual pega'n Madrid, pero en Asturies ... jeje.

Presentáu nuna tabla de madera, y acompañáu de pan recién sacáu del fornu. Voló.

Siguimos con Foie al Estilu la Cuyar, ricu, con una compota de mazana qu'oldea perbién col foie. Bona ración.

Yakysoba de Gochu, que foi lo que más nos prestó de la nueche. El mueyu bien ricu y bonos cachos de gochu colos fideos. Gran aciertu.

Con paliyos chinos incluyíos pa los valientes ensin mieu a enllordiase.

Gua Bao, típicu bocao de les cais de Taiwan, rellenu de carne guisao. La carne desfaese, bien rica, anque col pan la combinación resúltanos un pocu sosa. Pero'l mueyu picante ayuda a dar sabor a tou.

Acabamos con postres, que namás tienen dos en carta, con unes Naranxes del Güelu del Cocineru, receta casera qu'heredaron entemeciendo naranxes con un toque d'anís y azucar.

Nuna presentación bien guapa, y col toque xustu d'anís pa nun pasase de sabor.

Acompangámoslo tou d'Agua Borines y un par de botelles de vinu d'El Gran Cerdo, rioxa xóven que nun pudimos aguantar a pidilo gracies a la so etiqueta:

“Gran Gochu ye un gran vinu dedicáu a los direutores de bancu que nos negaron préstamos aduciendo que'l vinu nun yera un bien embargable. Trabaos, sudorosos y traxeaos personaxes, dalgún día vais afayar que les coses más importantes de la vida nun pueden embargase. Gracies a los amigos, pos cola so ayuda consiguimos a la fin faer l'embotelláu. Agora puedes esfrutar de la nuesa criatura más aceda, pruébalo con pasta o xamón, de gochu.”

Un vinu mozu, con muncho sabor a cereza y acidez. Nun tuvo mal. Sobremanera, tien una bona rellación calidá aprecio, como'l restu de vinos de la carta que nun pasa casi nengunu de los 10€ y son toos vinos distintos pa probar.

Eso sí, nun esiste nenguna referencia nin a Sidra asturiano, nin a vinos asturianos nin a cerveces asturianes.

Con un café, 3 persones cenando pagamos 65€. 

Un sitiu distintu, lo cual yá ye un puntu a favor, y con productu ricu y perbién presentáu. vamos siguilo de cerca.