Cabo Vidio

Direición: Salida 438 de A-8, dirección Valdréu - Cudillero / Cuideiru

Teléfonu: 985 596 112

Recomendaciones: Pexe

http://cabovidio.com/restaurante-cabo-vidio/
https://es-es.facebook.com/hotelrestaurantecabovidio

Calidá: 4/5

Preciu: 40€

Comentarios: Teníamos muncha gana conocer el Restorán Cabu Vidio. Siempres nos falaron maravíes d'él y amás les semeyes que víamos indicábennos que'l sitiu yera preciosu. Y nun s'equivocaron nada.

Indispensable dir al Cabu Vidio, pero al de verdá, enantes o n'acabante comer o cenar nel Restorán Cabu Vidio. Unu de los llugares más impresionantes d'Asturies.

Cabu Vidio ye, amás de restorán, un pequenu hotel rural, con una pintaza d'habitaciones increíbles. Pa dir al restorán ye recomendable acutar, yá que nun tien munches meses y suel tar llenu.

Comimos dos persones. Nuna mesa pegada a la cristalera, que da pasu a un xardín con una zona pa tomase daqué tranquilamente, un pequenu paraísu. El restorán ye preciosu, decorao'n madera, con aire "vintage" y con munchos detalles bien curiaos. Amás, el tratu ye familiar, lo que siempres s'estima.

Mientres decidíamos cola carta y los encamientos del día (el pescao varia según la ufierta del día, tou ye fresquísimu), traxéronnos d'aperitivu un Mousse de Mantequilla d'Anchoes, bien nidia, con un pan perrico.

Al poco, como segundu entrante, un Gazpachu con Aceite, ricu y refrescante.

Empezábamos bien. Jairo López, chef y propietariu del restorán, vieno a la mesa a encamentanos platos fora de carta y a dicinos que sí o sí teníamos que tomar el Sargu. Imposible nun fae-y casu.

El Sargu compartimoslu ente dos, asina que pidimos dos entrantes, Ensalada de Verdures, con pimientu coloráu, pimientu verde confitao, cebolla, llombos de sardina, tomate cherry y delles especies. Xenial combinación de colores y sabores. Fresca y perricos los llombos de sardina.

Siguimos con un Pulpu del Pedreru a la Brasa, con pataca y vinagreta d'escalibada. Testura perfeuta, nel so puntu. Y una ración enorme. Bien, bien ricu.

Y yá p'acabar, abondo fartucos, tráennos el Sargu al Llombu, emplatau. Una parte ensin espines y otra con elles (qu'echamos a suertes, por supuestu). Ración enorme, pa un productu bien frescu y con per bon sabor. El Sargu a mi resúltame un pocu insípidu polo xeneral, pero ésti taba bonísimu.

Finamos con una Tarta de Quesu Casera, casi a remolera y porque nos dixeron que nun nos podíamos dir ensin probala, porque tábamos llenos. Y pagó la pena. Bien rica.

Pa beber, un par de copes d'Albariño Etra y Agua de Borines. La única referencia a bébora asturiano ye la Sidra de Xelu Panizales.

Cafés y clines de la casa convidáos.

Pagamos 79€.

Una maravía de sitiu, con una decoración preciosa, un productu difícilmente ameyorable, basáu na tradición pero con un toque d'aire modernu.