Lilium

Direición: Centro Comercial Marina Lanzarote. Avenida Olof Palme S/N. Local B-29. Arrecife - Lanzarote

Teléfonu: 928 524 978

Recomendaciones: Croquetes de Platanu y Mayonesa de Güertu. Pexe.

http://restaurantelilium.com/
https://www.facebook.com/liliumlanzarote?sk=wall

Calidá: 4/5

Preciu: 45€

Comentarios: Ún de los locales a los que más ganes-y teníamos de Lanzarote yera Lilium, llegara a los nuesos oyíos el gran trabayu d'Orlando Ortega, cocineru y propietariu del restorán, y al poco de llegar a la isla yá tábamos acutando mesa.

Empecemos polo que menos me gustó, l'allugamientu. Va unos años crearon un Centru comercial nel nuevu puertu deportivu d'Arrecife, enllenu franquicies y de comida basura; y metanes tou eso atopa'l Lilium. Un oasis ente tanta mediocridá. Por otru llau, el local ábrese dafechu al puertu deportivu y ye un lluxu tar cenando coles vistes al puertu deportivu.

Cenamos na terraza, abellugaos del vientu lanzaroteño. La decoración ye moderna, col blancu típicu de la isla que tanto nos gusta. Meses espaciaes, grandes. Y llenu de detalles. Un sitiu bien atopadizu.

Serviciu escelente, bien sollerte, con bon ritmu nos platos pero ensin atoxigar. Tou perfeutu.

Mientres decidíamos qué comer y qué vinu tomar, traxéronnos una copa de Vulcano Blanco. Malvasía Volcánica Secu. Ún de los nuesos favoritos de la isla, anque'l que nos encamentaron, ensin dulda, ganó por goliada.

Y equí quiero faer un incisu. Faer vinu en Lanzarote ye pa héroes, pola falta d'agua, aprovechando al máximu la humedá creando pequenos "castros" qu'amás protexen del vientu, viña a viña. Y valorenlo. En cada restorán de Lanzarote atopes 4 o 5 referencies mínimu de vinos de la isla, de meyor o peor calidá, y a un preciu non precisamente baratu. Defenden el so productu, la so identidá. Tendríamos d'aprender los asturianos, que tanto esbabayamos de defender lo nueso colos vinos de la Tierra de Cangas, que me recuerden tantu a los de la isla pola forma tan complicada de recoyer la uva. Los restoranes asturianos tán a años lluz de los lanzaroteños.

Vaigamos cola cena.

Como aperitivu traxéronnos Tosta de Batata con Salmón. Yá sabéis que la batata (boniato) ye una pataca duce bien típica na isla,  asina qu'oldea xenial esa dulzura col toque de salmón.

Traxéronnos Panes Artesanos, con Aceite Picual, Mueyo de Tomate y Mantequilla de Gofiu. Encantónos tou, pero sobremanera, el mueyo, anque la mantequilla taba bien nidia, rica tamién.

Ún de los platos más famosos del Lilium son les sos Croquetes de Plátanu y Mayonesa de Güertu. Lleven Chorizu Chacón, chorizu ellaboráu por una famosa cadena charcutera de la isla. Xenial la mayonesa de yerbabona, da-y un puntazu bonísimo al platu. Gustáronnos enforma, la testura ye estupenda.

Siguimos con otru platu típicu del restorán, Monturrito de Batata. Ye un milfueyes de Batata con Quesu de Cabra la isla, Salmón y Mueyu de Freses. Foi'l platu que menos nos prestó, quiciabes porque nun tamos tan acostumaos al sabor la batata, dulce abondo, pero paeciónos menos equilibrao que los anteriores platos.

Como platos principales pidimos, Llombu Brasiáu de Sama Fresca con Guisu de Chocu y Parmentier de Batata. La Sama ye un pescao blancu suave de la isla. El platu ta bonísimo. Bona ración, con un parmentier bien, bien ricu. Gran eleición.

Tacu d'Atún de Temporada tratáu como un Tataki y Adobáu al Estilu Canariu, espectacular atún. Ración grande, pocu fecha, como me gusta, que se desfai solu. Aboneme al atún na isla. Diéron-y un toque de calor pa caltenelu caldiáu.

Empezamos colos postres, Crema de Galleta María con Dulce de Lleche, bien bona, ye como tomase un tazón de lleche con galletes María. Pidiolu la llambiona, que pa mi eso ye demasiao dulce.

Yo pidí un Carpaccio de Piña Tropical con Xeláu de Cocu. Per ricu. Encántame cómo sabe la fruta tropical na isla, porque sabe a fruta. Asina que la combinación de la piña col xeláu ye maraviyosa.

Pa beber, encamentáronnos Los Perdomos Malvasía Secu. Ensin dulda, el vinu que más nos prestó de la isla. Los vinos na isla, salvo esceiciones, o güelen o saben, pero ésti ta perfectamente equilibráu, güel y sabe xenial. Amás, darréu, comprobemos qu'a Jorge Sibaritastur presto-y. Pocu más se puede añedir. Vinu de 18,69€.

Con cafés y agua, pagamos 95,96€.

Si vais a la Lanzarote, Lilium ye ún de los indispensables. Agradecer a Orlando'l tratu y los encamientos d'otros restoranes na isla, daqué que nun suel asoceder nel gremiu.