Nueva Visita: La Mar y Morena

Direición: Cai Jovellano, Nº8, Oviedo / Uviéu

Teléfonu: 985 203 606

http://lamarymorena.eligemenu.es/index.php#home

https://www.facebook.com/pages/LA-MAR-Y-MORENA/189379101097999?fref=ts

Recomendaciones: Pexe Azul

Versión Castellán: http://www.lesfartures.com/2015/07/nueva-visita-la-mar-y-morena.html
Anterior Visita: http://www.lesfartures.com/2013/01/direccion-c-jovellanos-n8-oviedo-uvieu.html

Comentarios: Tomase una botella sidra tocando l'antigua muralla d'Uviéu ye un luxu que namás te puedes permitir en La Mar y Morena, llocal onde puedes amestar sidra, vinu y copes pa entamar la nueche.

Averamos al llocal a probar les 1ª Xornaes de la Costera del Pescáu Azul d'Asturies, que según nos dixeron yera la primer vegada que se faen unes xornaes basaes nel pescao azul. Siempres nos encantó'l pescáu azul, y n'anterior visita al llocal quedamos bien contentos cola manera que tienen de tratar el pescáu , asina que la combinación apuntaba maneres.

Comimos na entrada'l chigre del restorán, única zona'l chigre onde echen sidra, amás el menú y'l día pidíenlo. Sidra Viuda de Angelón, maraviyosa. Amás, el poder tomala col so ceador, fai que valores inda muncho más les coses. El trabayu que fai Fran cola sidra ye únicu.

Empezamos con un Pastel de Bonitu con Mueyu de Piquillos. Agradezse daquién honrao que nun engañe col típicu "Pastel de Tiñosu". Pastel de bonitu, nidiu y cremosu, col puntazu que-y da'l mueyu.

Siguimos con un platu que prestonos enforma. Tosta d'Hoxaldre con Bocartes Marinaos, espectacular esa combinación de la tosta d'hoxaldre (per ricu, por ciertu) col bocarte, el tomate y les nueces. Yá nos dixeron que, col ésitu que ta teniendo, esti platu de xuru se quede na carta. Tou un aciertu,

Ensalada de Xarda Escabechada a la Sidra con Cecina y Quesu Afuega'l Pitu Blancu y Colorau. Tenía mieu que l'escabeche matara la Xarda, pero al contrariu, cola sidra dába-y un sabor peculiar que sobrevivía l'afuega'l pitu. La cecina ayuda cola combinación y fai un platu bien sabrosu, con distintos matices. Amás, detallazu que la Xarda venga ensin espines, mataría'l platu.

Otra sorpresa maraviyosa, Bocartes rellenos de Quesu La Peral, primer vegada que probaba un platu asina y taba bonísimo. El quesu la peral ye fuerte de por sí, pero combina perfeutamente col bocarte y amás apúrre-y cremosidá a un pescáu "seco" de por sí.

Bonitu asáu al estilu Tapia. Pocu qu'añedir a un platazu increíble. El bonitu ye un pescáu seco, y que depende enforma de la manu la cocina pa pasar de daqué normal a daqué esceicional. Nesti casu, al faelo en cazuela con aceite, el bonitu tresformase nun platu xugosu per ricu. Amás vien con cebolla pochada percima.

Acabamos con Tatín de Mazana Caseru, mui rica.

Tou por 42€ por pareya. Gran menú, con productu de primera, perbién cocinao y presentao, nel centru d'Uviéu. Como veis, La Mar y Morena caltien el nivel.

Aprovechamos pa dexavos unes semeyes de  Sidrería La Finca, de los mesmos dueños que La Mar y Morena, y qu'estos tuvieron l'amabilidá d'enseñanos.

Queda pendiente visita. En plena Cai Gascona.