Teléfonu: 923 53 02 88
Recomendaciones: Gochucu, embutíos.
Preciu: 30 €
Comentarios: Restorán allugáu nuna pequena llocalidá d'unos 1000 habitantes na provincia Salamanca, típicu restorán castellanu de los d'antes.
Importante, si queréis comer gochucu que ye lo meyor ensin dulda del llugar, llamar antes pa encargalo yá que tienen qu'avisar al carniceru pa que lu traiga.
Vamos empezar polo malo'l llocal, y ye la decoración. Cabeza de güe colgada, cartelos de corríes de toros, etc... Si nun te gusta la temática como a mi pos nun te va prestar la decoración. Y equí acabemos colo malo porque la comida fai escaecer tolo anterior.
Sabíamos que veníamos comer gochucu y p'antes comentámos-yos que punxérennos un pocu lo que vieren, unos embutíos y dalguna ensalada p'acompañar.
L'embutíu ye de categoría, esi xamón ibéricu taba coyonudu y el restu nun quedaba atrás. Tol productu vien de la carnicería del pueblu, propiedá de Roberto, de xacíu antes de volver pasamos toos a mercar daqué de xamón ibéricu y de quesu pa casa. Él encárgase de criar los gochos y depués viende los sos manxares na so carnicería, agradece-y tamién los encamientos de los productos que nos vendió'l día anterior pa faer una parrillada, grandes productos.
Falando col carniceru cuntónos que'l quesu yera de Pollos, un pueblu cercanu, y qu'esti quesu tuviérase sirviendo nel Bulli, la verdá que de primeres pensábamos que yera una chancia, pero confirmónos que ye real y depués buscando per internet vimos que nun mentía. Si vos interesa son Quesos Cañarejal y confirmo que ye un gran quesu d'oveya.
Dempués de los embutíos que como puede reparase nes semeyes yeren de gran cantidá teniendo en cuenta que yéramos 7 comensales pasamos al platu principal.
Que dicir d'esti gochucu, impresionante, fechu xusto nesi puntu nel cual la piel ta rustida y la carne desfaise, ufiertáronnos repetir pero yá nun podíamos más.
Si preferir tamién faen cochifritu, anque nós decidimos por comer el gochucu más tradicionalmente.
Pa rematar una tarta al wiskhi, normal, ye mercada asina que cualesquier puede comer una igual na so casa. Faese de menos dalgún postre caseru, alcuerdu una visita anterior onde teníen una crema catalana casera bien rica.
Pa beber punxéronnos una Ribera del Duero nuevu de 2014 Camino Nuevo, típicu vinu que te pueden poner en cualquier menú del día, nada fora de lo común.
Incluyendo cafés y unos clines saliónos por unos 27 euros per persona, con tolo que comimos y la calidá paecióme baratu.
Si pasáis pela zona y prúyevos comer un bon gochucu esti ye un gran llugar pa ello, y si nun tenéis tiempu siempres podéis averar a la carnicería de Roberto a llevavos un pocu d'esi xamón ibéricu.
No hay comentarios
Publicar un comentario