El Poeta


Direición: Calle La Estación 10, Avilés
Teléfonu: 985 564 060




Recomendaciones: Tataki de Atún Rojo
Facebook: https://www.facebook.com/pages/El-Poeta-Restaurante/375822969276546?fref=ts

Calidá: 3/5
Preciu: 22€



Comentarios:  Nueche de fueos n'Avilés, tou llenu hasta la bandera, nin nos sitios habituales y poniendo cara d'anxelinos queríen danos de cenar ...

Asina qu'a la caza y captura dalgún sitiu onde pudiéramos picar daqué rápido, entrugamos n'El Poeta y diéronnos mesa.

Sitiu preciosu asitiáu nel barriu de Sabugo d'Avilés, decoración bien guapa, con parés de piedra y madera, zona de barra onde puedes picar daqué, al fondu un salón pa cenar con tele y nel pisu de riba (ye un pisu antiguu d'Avilés reformáu) un salón ampliu con ventanales de madera abiertos a la cai piatonal. Un luxu.

El local taba hasta enriba, y el serviciu nun daba abasto, entá con tou l'atención foi bien bona, el serviciu sollerte y rápido. Y amás, cenamos bien.


Pidimos d'entrante unes Zamburiñes a la Plancha. Bones, Grandes, y con bon toque de plancha. Fálta-yos un aceite de más calidá por que sepan daqué más, pero tán riques.


De platu, pa compartir, un Tataki d'Atún Coloráu con Mueyu Teriyaki y Mayonesa de Wasabi. Mui, mui ricu. L'atún taba tan bonu qu'a mi me sobraron los mueyos. Bona ración amás, con una presentación percuidada. Bon platu.


Como postres pidimos Tarta de Cenahoria con cobertoria de Crema de Quesu, densa y dulce, a mi nun me dio más. Pero pasó'l corte la llambiona. Rica.


Yo pidí Tarta de Quesu. Contundente, pero bien rica. Casera.

Pa beber, botella d'agua de plásticu y un par de copes de Albariño (imposible preguntar cuál col trasiegu).

Carta de vinos pequena y nenguna referencia asturiana.

Pagamos 44,40€.

Un sitiu  guapu pa cenar con bona comida. Na carta citen: "La comida entra antes polos sentíos que pola barriga". Nun llegaron a emocionanos, pero nun tuvo mal.

Coméntenme unos amigos que tuvieron un problema na terraza. Primero dixéron-yos que sí daben cenes na terraza y darréu dixéron-yos que non, colo que tuvieron que dir buscar otru sitiu pa cenar.


0 comentarios :

Publicar un comentario