Presentación Bodega Vitheras


Dirección: Carbachu - Cangas del Narcea
Teléfono: 917 080 450 / 676 921 948



http://vitheras.es/


Cultivar vinu en Cangas del Narcea tien daqué d'heroicu. Avezaos a ver hectárees interminables de cepes na meseta peninsular, el suroccidente asturianu acútanos una orografía espectacular onde les cepes formen parte del monte. Por eso, que Vitheras signifique Viticultores Heroícos Asturianos indícanos la dedicación, pasión y sacrificiu que la xente de Cangas, puxando escontra la so orografía y la dexadez (política y hostelera) asturiana habitual.


Vitheras ye una familia que torna'l so Carbachu natal alcontrar los sos raigaños, con documentos que demuestren que yá llantaben vinu dende'l S XVI, onde recueyen los sos nietos el testigu d'un güelu dedicáu con pasión a la recuperación de los vinos. Amás, atopamos cola que ye probablemente la mayor esperta na recuperación de la uva autóctona asturiana. Y entós, tou encaxó a la perfección.


Va años yá oyemos falar de María del Carmen Martínez Rodríguez, investigadora del CSIC, pol so inmensu trabayu de recuperación y selección de viñes pa Terras Gaudas, siendo una de les artífices del ésitu actual que vive'l vinu albariño nel mundu. Sabíamos que yera de Cangas y sabíamos que taba investigando, contra vientu y marea, la recuperación y selección de les meyores cepes de variedá autóctona asturiana pa replantales en Cangas. Lo que nun sabíamos ye que, xuntu cola so familia, diba producir el meyor vinu blancu qu'esiste en Cangas hasta la fecha nel so primer añu. Y eso tien un méritu increíble.


Conocimos Vitheras gracies la visibilidá que-y dio algamar la Medaya d'Oru nel Prestixosu Concursu Internacional de Vinos de Monte CERVIM (Centru Richerca Studi Valorizzioni Viticultura Montagne) que van tener que dir recoyer el próximu mes de Payares en Fuerte de Bard (Valle di Aosta - Italia). Y punximos en contactu con ellos darréu.


Carlos Ron Martínez, presidente executivu, acoyónos na casa familiar, preciosa casona asturiana con sieglos d'antigüedá, y esplicónos la so hestoria y filosofía dempués de presentanos a tola familia, que d'una o otra mena collaboren na empresa. Un proyectu mozu ya ilusionante onde toos apurren, dende los adolescentes hasta los güelos.


Darréu enseñáronnos les sos viñes, onde pudimos conocer gracies a les esplicaciones de Carmen les variedaes autóctones asturianes albarín blancualbarín tintuverdejo negru y carrasquín, probales y comprobar in situ la diferencia visual y de sabor ente elles.


Pel momento tienen media hectárea, anque'l so oxetivu ye llegar l'añu que vien a les 27000 botelles y a mediu plazu a les 7 hectárees. Como podéis comprobar, les vistes son espectaculares pero'l trabayu pa llograles ye duru una por mor que la mecanización nun terrén asina ye imposible.


Tamién nos enseñaron l'antiguu llagar onde ellaboraben el vinu, Un sitiu llenu d'hestoria perfectu p'atopase colos sos raigaños.


Yá de tarde, y n'esfrutando d'una maraviyosa comida nel Resturante Marroncín, asistimos a la presentación del vinu en sociedá.


Presentáronnos el so Vinu Blanco Vitheras, ensin dulda, la xoya la corona. Maraviyosu vinu blanco que tien tou pa trunfar, un llixeru toque amargosu, persistencia na boca, equilibráu ... una gociada de vinu qu'esperemos tea en curtiu nos restoranes asturianos. Pa ser la so primera añada, el nivel del vinu ye escepcional, anque yá tán trabayando n'ameyorar pequenos matices pal añu que vien. Un vinu blanco de pergrande calidá, con personalidá propia que güel y sabe. Tenéis que probalo.


Tamién presentaron el so Vinu Rosáu Lucía Vitheras, n'honor a la güela la familia. Apueste arriesgáu yá que ye'l primera rosáu que se comercializa n'Asturies. Vinu frescu, afrutáu, pero con un toque ácedu bien interesante. Utilicen Verdejo Negru como uva principal de la que yá destacaba Xovellanos nel Sieglu XVIII pola so calidá y pocu tinte.


Gran día pola Tierra de Cangas pa conocer una Bodega con muncho futuru y un productu escepcional. Munches gracies a Carlos, Carmen y al restu la so familia por compartir la so pasión con Les Fartures. Un auténticu placer.


Dexámosvos un video de la presentación


0 comentarios :

Publicar un comentario