Contact Me

Nombre

Correo electrónico

Mensaje

Hover Setting

default

Los Llaureles

Direición: Camin de Miyangues, 2 - Torazu - Cabranes
Teléfonu: 629 769 059



Recomendaciones: Acuta Menú Degustación + Habitación, reláxate y date un homenaxe.


Web: http://www.losllaureles.com/
Facebook: https://es-la.facebook.com/LosLlaureles
Twitter [@leonclandestino]: https://twitter.com/losllaureles
Instagram [@losllaureles]https://www.instagram.com/losllaureles/



Calidá: 5/5
Preciu: 40€


Comentarios: Si Asturies ye'l paraísu, Los Llaureles ye la perfeuta representación d'Asturies. Un abellugu de paz, ensin cases alredor con unes vistes espectaculares onde puedes vivir una esperiencia culinaria maraviyosa (y distinta) a un preciu realmente baratu.


Averamos un vienres a cenar (previa reserva. Esto ye importante porque ensin reserva nun acepten meses). Amás d'acutar mesa, acutamos una de los cuatro habitaciones que tienen nel so hotel rural, asitiáu na primer planta la casa. Y paga la pena.


La casa ta decorada con munchu gustu, al detalle; como les habitaciones y el restorán. Ye una casona asturiana rehabilitada, de piedra y madera, onde foi un auténticu lluxu poder dormir mientres nun paraba de llover nel esterior. Nel hotel nun hai nin Televisión, nin WIFI nin nada que te caltenga conectáu (cobertoria sí). Asina que vete, reláxate, desconecta y ponte en manes los hermanos Gallego (Josa y Carlos) y Carlos Bacallao.


La zona del restorán ta cubierta de cristaleres y les sos vistes son realmente espectaculares. Si amás fai bon tiempu tienen una pequena terraza de madera. Pero foi un auténticu lluxu cenar cola chimenea puesta, la lluz tenue (anque les semeyes resiéntanse) y música nidia de fondu. Tou ye sele y lo que tendría de ser una cena camuda nuna esperiencia gastronómica maraviyosa.


El so Menú Degustación varia en función la Estación y los productos llocales. Nós cenamos el so Menú Seronda-Iviernu, anque en curtiu mariden un nuevu menú con cerveces que tien perbona pinta (anque falten referencies asturianes).


Empezamos col so Trufa de Seronda como aperitivu. Una trufa con foie envueltu en cacáu con una base de pan d'almendra y dulce de lleche. La cosa empezaba bien.


Carne de Mazana, Sidra y Quesu. Una panacota de Gamonéu con pan de mantega y xelatina de sidra duce. Xeniales eses testures, el contraste de la suavidá de panacota colos cachos de mazana. El Gamonéu ta bien nidiu, sabe, pero nun mata'l platu. Perfeutu. De 10.


Crema de Coliflor Turrada. Lleva cacáu, quesu Cheddar, llombos mui finos d'Anchoa, crema de dátil y una fritura de pasta. Tenía-y mieu a esa coliflor, pero ta suavísima, y queda xenial col puntazu l'anchoa. Tou ye equilibráu y da gustu comelo.


Amás, vien con una presentación preciosa.


Salmón Thai. Una tires de salmón con unos cacagüeses de Wasabi (suaves), Yogur d'Aguacate y Crema d'Eneldu. Tráennos unes pinces y esplíquennos cómo comelo. Pliégase'l Salmón coles pinces, introduzse nel mueyu soya (con Tayina de Miel y Llima) y cómese. Perfeutu. Mui orixinal. El cacagüés de wasabi per orixinal.


Y la manera comelu, tamién.


Siguimos col Astur-Bao, un Bao (un mini bocáu taiwanés, que tanto ta de moda agora) asturianizáu con picadiellu,mayonesa y canónigos. Bonísimu. Esi pan duce col picadiellu y el toque la mostaza ... terrible.


Ravioli de Cecina. Presentáu nuna cuyar pa tomar d'un bocáu. Tien una base de pataca frita, con cecina rellena de güevu de falpayar. Percima una picada pimientu y cebolla. Ta ricu, pero prauticantemente namás notamos la cecina. Quiciabes lo que menos namoró de la nueche.


Tomate Asáu, Cebolla con Ron y Calamares na so Tinta. Ye un tomate rellenu de cebolla caramelizada al ron, con una base de tinta de calamar y percima unos calamares a la plancha con ayu y perexil. Volvemos recuperar el nivel. Bonísimu platu. La combinación del ácidu del tomate cola cebolla y el ron ... buenísimo. El ron ta suave, ¿eh? Nun Penséis ...


Finamos los platos principales con El Canelón y les sos Cogordes. Y asegúrovos que costó, y eso que veníamos con fame. Penriba una crema cogordes deshidrataes con cachos de Parmesanu. Ye un platu contundente, que sabe abondo a cogorda. Lo único que sobra ye un pequenu espárragu que vien percima, anque suponemos el so oxetivu sería da-y un pocu frescor a un platu contundente de por sí. Bonu.


Pal primer postre, namás nos indiquen que lo probemos y qu'intentemos aldovinar los distintos ingredientes. Asina que nos traxeron la Sopa Fría y fiximos l'exerciciu. Un aniellu de pesto d'albahaca con una base lleche condensada de Mangu acompañada d'un pocu de mangu y almendres garrapiñaes. Con un toque curry fascinante.  Bonísimu. La testura, el sabor ... tou perfeutu. Y xenial el xuegu de cosadiella pa valorar el gran trabayu de cocina.


Acabamos col so postre de Chocolate. Un muñuelu de Chocolate Bañáu con Cerveza. Lleva una base de chocolate caliente qu'entemez perfeutamente col amargor del muñuelu (nótase esa cerveza). Encamienten rompénoslo tou y entemecelo p'apreciar l'equilibriu del platu.


Como sorpresa, y como tábamos de cumpleaños, tráennos un mini pastel de chocolate con kikos que casi nin comimos de lo llenos que tábamos. Tou un detalle. Amás, a les moces por ser la fin de selmana de los namoraos, regaláben-yos una flor natural bien guapa.


Pa beber, Agua Borines y Enate 2-3-4 2011, que nos encanta.


El pan ye artesanu fechu por ellos mesmos. De quesu y pipes; y de cerveza negro. Bonísimu.


Na carta tienen S1 y S2 de Valdesotu como referencies asturianes. Y tán trabayando pa introducir sidra brut y cerveces artesanes asturianes. Preguntamos por Sidra y tienen Pomar Roseé de Viuda de Angelón (anque nun vien mentada na carta nin la ufierten fora d'ella). Tien de potenciase más la perfeuta harmonía qu'esiste agora mesmu ente la nueva cocina amestada a la vieya tierra colos caldos propios asturianos. Ye la meyor manera d'entendelo.


Yá veis que tou perfeutu. Y nun ambiente relaxadísimu, pa esfrutar bien adulces y rellambenos.


Lo meyor vien agora. El Menú Degustación cuesta 29€. Vinu y cafés aparte. Un preciu bien axustao pa probar coses distintes y perriques. Lo ideal ye qu'amás quedéis nuna habitación, pero si nun ye asina, un gran plan sería comer, esfrutar de les vistes y pasar el día por Torazu, un pueblín preciosu.


A otru día, esfrutar d'esti desayunu con estes vistes merez enforma la pena.


Un día maraviyosu.



No hay comentarios

Publicar un comentario