Vinatería La Esquila

Direición: Calle Caridad, 3, Xixón
Teléfonu: 984 290 794


Web: http://www.laesquila.es/
Facebook: https://www.facebook.com/laesquilagijon/
Twitter: [ @EsquilaLa ] https://twitter.com/EsquilaLa

Calidá: 3/5
Preciu: 30€

Onde nel so día tuvo El legado de Baco que tan bones alcordances dexónos, sabíamos que siguía habiendo una vinatería qu'ufierta coses distintes y, en concretu, una hamburguesa que merez ser probada.

Fuimos con reserva un vienres de fai yá unes selmanes y comentáronnos si preferíamos cenar enriba o embaxo, que pel momentu lo teníen vacíu pero que llegaría una mesa grande qu'igual armaben daqué de barullu. Na parte de riba tienen la barra y delles meses, había bastante xente y preferimos la tranquilidá de la planta baxa.

Namás al preguntar si teníen dalgún vinu de Cangas dixéronnos que dalguna botella quedába-yos pero nin en carta nin fora d'ella había…y ye que nun tán nada entusiasmaos con ellos, pero si n'Asturies nun movemos lo nueso…cuando amás ye bonu y puede ser diferenciador…una pena.

A nós encántennos, dalgunos más qu'otros, pero tienen el plus de ser d'equí y yo, si fuera un turista de visita, trataría de probar un vinu la zona.

Asina que un bon Nibias Nº 4 p'acompañar:

Tienen una carta con tapes, sartenes, tostes, cachopos…bien variada y con delles sorpreses de creación propio más que bones.

Empezamos con unos Augustinos, puerros rebozaos y rellenos de xamón y cebolla caramellada con espluma d'aguacate. Perricos. Un platu distintu y resultón:

Probemos dempués el Secretu ibéricu con mazana. Bon productu y bien de puntu:

Y el gran colofón. L'Hamburguesa hoxaldrada La Esquila. Sorpresón. Paga la pena visita-yos namás por esta hamburguesa. Un conceutu distintu al que tamos avezaos.

La sustitución del pan pol hoxaldre, aciertu plenu. Amás perbién fechu. La carne nel so puntu, y de considerable tamañu. Acompañada por unes pataques en cesta de fridora y dellos mueyos. Platazu ensin discutiniu:

De postre, ufiertáronnos una Crema de chocolate. Mil caxigalines podíen traer como tal, y llevamos otra sorpresa. Una copa con una crema de testura perfeuta, la siempres bona combinación con naranxa y el toque que poníen los petazetes. Voló:

Un total de 55€, col Nibias a unos sorprendentes 15€.

Ensin dulda, vamos volver a por esa hamburguesa y a probar dalguna nueva creación cola que nos sorprendan.