Bodega Vitheras: Añada 2015

Dirección: Carbachu - Cangas del Narcea
Teléfonu: 917 080 450 / 676 921 948




Web: http://vitheras.es/
Facebook: https://www.facebook.com/Vitheras
Twitter [@vitheras]: https://twitter.com/vitheras

Anterior Visita: http://www.lesfartures.com/2015/10/presentacion-bodega-vitheras.html


Pases Cangas unos 8km y vas caltriando más y más nel valle, per una carretera llena de curves siguiendo'l cursu del ríu Cibea. Na falda'l monte, con rimaes de casi 45º, empieces ver viñeos, casi siempres empobinaos al sur, buscando la máxima esposición posible al sol, al abellugu la borrina.

Asina llegues a Carbachu, un pueblín preciosu, onde solamente s'escucha'l Cibea pasar y dalgún perru que te recibe mientres pasies despistao. Ellí l'añu pasáu conocimos a Carlos Ron y so encantadora familia, y quedamos namoraos de Vitheras, anque ayudó un pocu que tamién probáramos so vinu.


Con una producción de namás 700 botelles, dedicaron 2015 a recoyer premios (medaya d'oru nel Concursu Internacional CERVIM 2015 y medaya de plata nel Concursu Internacional Bacchus 2016) y a patuxar los meyores restoranes de la península p'asoleyar so vinu, cola so meyor carta de presentación: el so sabor.


Anguaño vuelven cargaos de nuevos proyectos ya ilusiones y con una nueva remesa de vinu. Atopen en plena obra d'ampliación de los viñeos de la bodega, pa pasar de la media hectárea actual (por eso ye necesariu mercar uva a productores llocales) a 2 hectárees, y llegar hasta les 7 hectárees en cuanto puedan. Ye un apueste de futuru y la so intención ye crecer cada añu ufiertando un productu d'alta calidá.


Convidáronnos a pasar una tarde con ellos, enseñanos les obres d'ampliación de los sos viñeos, la so bodega, y amás, a probar la so nueva añada.


De les 700 botelles que producieron l'añu pasáu, pasen a 20000 anguaño. 10000 de blancu y 10000 de rosao. Como veis, el saltu ye perimportante. El retu yera comprobar si esi saltu en producción amenorgaría la calidá del productu del añu pasáu, y ... vais comprobar que non. Amás, anguaño vais poder probalo vós mesmos, que con esi volume de producción, va podese (esperemos) atopar en tiendes y restaurantes.

Yá na so casa familiar, pudimos faer una cata de la nueva añada. Presentáronnos el diseñu de les nueves etiquetes y avisáronnos que seríamos los primeros en probar el vinu, inda ensin estabilizar y ensin penerar. Tou un privilexu.


Vitheras Blanco, vinu con un 98% d'Albarín Blanco y 2% de Moscatel de Granu Menudu (autóctonu asturianu). Un vinu maraviyoso, qu'ameyora si cabo'l 2014. Ye un vinu que güel, y que güel a fruta maduro, con un toque importante a piescu. Y sabe, vaya si sabe, entra solu pero tien cuerpu, aguanta na boca y dexa un regustín amargosu típicu del albarín blancu. Un vinazu impresionante que nos encanta.


Vitheras Lucía, vinu rosao n'honor de la güela la familia. 46% albarín negru, 29% mencía y 25% verdeyu negru. Un vinu fresco, que güel a fruta colorao, muncha artimora, y qu'entra solo. Perfeutu pa un aperitivu ya inclusive pa comer con él. Amás, ye'l primer y únicu rosao fechu n'Asturies. Un vinu distinto y per orixinal.


Amás, cuntamos cola presencia de Pepe Ron (Restaurante Blanco) qu'acompañó la cata con 3 maraviyoses tapes, onde pudimos xugar col Rosao yá'l Blanco y comprobar con qué tipu comida harmonicen meyor.


Les tapes fueron Empanada de Carne, típica de la zona de Cangas. Un sabor que fai tornar a la infancia, y onde'l rosao amosó firme ante la potencia del sabor de la empanada.


Cremosos de Rey Silo con Tomate y Anchoa, y equí trunfó'l Vitheras Blanco.


Salmón Afumáu con Terayaki, platu típicu de la casa, y que nos encantó tamién col Blanco.


Xente de Cangas apostando por sacar alantre Cangas con productu de primera. Ésti ye'l camín. Entá queda enforma por faer, y el percorríu ensin dulda va ser apasionante, pero los resultaos yá tán llegando y ye daqué de lo que tamos arguyosos. Un preste compartir esta esperiencia.

0 comentarios :

Publicar un comentario