Contact Me

Nombre

Correo electrónico

Mensaje

Hover Setting

default

La Talamera

Direición: Plaza Santa Ana, 8 - Ribadesella / Ribeseya
Teléfonu:  984 841 040



Recomendaciones: Quesos Asturianos, Pexe y esa maraviyosa caña de Sidra Brut Viuda de Angelón


Web: http://latalamera.es/
Facebook: https://es-la.facebook.com/latalamera/
Twitter: [@latalamera] https://twitter.com/latalamera
Instagram: [@latalamera] http://instagram.com/latalamera


Calidá: 4/5
Preciu: 30€


Comentarios: Cuntamos 9 acepciones distintes pa definir Talamera na llingua asturiana,


talamera, la: sust. Piedra [saliente pa poner los cacíos de la lleche na corte]. Estante [pa poner los quesos a curar]. [Tipu de] vasal [de la cocina]. Sitiu [nuna cabaña onde se pon la cama]. Camastru, cama [ruina y pequeña]. Armazón [formáu por dos estandorios auníos por tables, que se pon na parte d’alantre del carru pa que la carga nun estorbe a les vaques que van xuncíes]. Pisu [del horru]. Conxuntu [de coses apilaes mal curioses]. Conxuntu [de cañes que se ponen nun gayu pa secar].



pero ensin dulda, la Talamera de Lluis Nel Estrada, busca aunir quesos, cocina y ser un pegollu o una talamera del horru de la gastronomía asturiana. 




Lluis Nel, creador y entamu de too esto, lleva munchos años llanzándose al vaciu lluchando pola so pasión, poner en valor la gastronomía asturiana al traviés del so productu. Tres 9 años como Direutor Gastronómicu y de Comunicación Corporativa de Crivencar / Tierra Ástur, onde se potenció y asoleyó -cuando yeren a facelo- el productu asturianu reinvindicando'l so potencial pal públicu asturianu yá'l turismu; montó la so propia empresa de Consultoría Creativa Gastronómica 40 Primaveres, un conceutu distinto y rompedor n'Asturies. 



Ún de el promotores de la DOP Vinu de la Tierra de Cangas, de la IGP de Choscu de Tinéu, ún de los mayores espertos en quesos d'Asturies, recuperando quesos escaecíos y poniendo en valor Asturies como una de manches queseres más importantes d'Europa ... y tou ensin perder la honestidá, la humildá yá'l trabayu anónimu (y munches vegaes, pocu reconocíu). 



Agora Lluis sospriéndenos con un GastroBar nel so Ribeseya de l'alma onde pon en práctica toos estos años defendiendo (y cocinando) el productu asturianu. De la cocina a la mesa de quesos, con esa vergoña que-y carauteriza, cualesquier  que nun lo conoza va pensar que ye un emplegáu más y non una de les persones más importantes de la gastronomía asturiana de lo últimos años. 



Asitiáu na plaza de Santa Ana, xusto al llau del puertu, nuna cai más sele del debullo turísticu, tien una terraza esterior enllena pel branu ya un interior que destaca pola so decoración informal. Según entres, zona de barra y meses altes pa tomase daqué (o esperar mientres cenes) y de siguío una mesa de quesos (indispensable pa Lluis Nel). Al fondu abre una cuadráu coles meses pa comer. Ye un espaciu pequenu, asina qu'acutái.



Ún de los puntos fuertes de La Talamera ye que ye'l primer restorán d'Asturies en tener una caña de Sidra Brut. Un productu que lleva casi 10 años nel mercáu y que naide s'animó hasta agora a introducir en caña en chigres y restoranes (ta tou copao poles grandes distribuidores que de normal ufierten namás cerveza industrial mediocre). Nesti casu, Lluis Nel ufierta un cañeru de Sidra Brut Viuda de Angelón, que tanto nos gusta. El Llagar Viuda de Angelón, como siempres, anovando ya ufiertando los sos productos más cimeros de forma prestosa pal consumidor. Esti formatu en cañeru ta siendo tou un ésitu n'EEXX y esperemos velo más de cutiu pequí. 



Tenéis que probala; una sidra con cuerpu, con un toque acedu, con espluma que persiste que yá quixeren munches cerveces y un frescor na boca que fai que puedas beber una tres otra. 

Si'l productu ye bonu, y ésti lo ye (vaya si lo ye), siempres gana en barril, asina que yá solo merez la pena averase a La Talamera por ello.



Sentámonos dos persones a cenar. Un bon plan sería pidir una tabla de quesos asturianos. Lluis Nel tien unes 15 variedaes de quesos distintes na carta, que va rotando según el so estáu óptimo de consumu. Los 15 que tenía son asturianos, pero comentónos Lluis que siempres va intentar traer dalgunu de fora desconocíu. 



Nós empezamos con unos Calamares Fritos con Virutes Cítriques. Bona ración, de calamar frescu, ricu, con un toque cítricu (amiestu de naranxa, pepinu y llimón) nel rebozao que-y queda perbien. El cítricu güel más que sabe, asina que nun mata'l sabor orixinal del calamar, lo cual ye d'agradecer si ésti ye bonu; y ésti lo yera. Ún de los platos más solicitaos, según cuntáronnos. 


Fora de carta, ufiertáronnos una Ventrisca de Bonitu, Y non pudimos resistir. Según díxonos Lluis Nel, los pexes vienen direutamente de la rula de Ribeseya, que la tien casi en frente del local. Impresionante Ventrisca a la plancha. Acompañada d'unes pataques panaderes y d'ensalada. Amás, una ración mui curiosa cola que casi cenamos. 



Pa rematar pidimos, Tacos de Cadril de Xata Ecolóxica al Ayu. Pa dos. Otra ración enorme acompañada de pataques frites "de les verdá". La carne de primera, buenísima, pasada namás lo xusto. Pura mantequilla na boca. 



Imposible animanos al postre porque tábamos qu'españábamos. Queda pendiente falavos d'él n'otra ocasión. Inclusive ún puede animase con un pocu de quesu ya una copa de Sidra de Xelu (que sí, vienden por copes, otra de les coses qu'echábamos en falta na hostelería asturiana). 



Cenamos con delles cañes de la Sidra Brut. Anque hai una per bona carta de Sidra Brut Reserva, Rosada, Sidra de Mesa y Sidra de Xelu del Llagar Viuda de Angelón. Productu de primera pa una sidra de primera. Sidra en botellín Avalon de Trabanco, de Pera y La Naveta del Llagar Viuda de Angelón.



Amás, carta de cerveces artesanes asturianes y vinos asturianos. Tamién hai cerveces de fora (la caña de Pillsner Urquell ye una maravía. Cerveza rubia checa buenísima) y vinos distintos d'otres Dos a precios bien algamadizos. 




Pan d'Escanda Spelastur. Pocu más qu'añadir. Buenísimo.



Tolos sos platos tán fechos ensin Gluten. Otru puntu a favor del local. Aprovechamos a indicavos que n'el nuesu Menú ¿A la gueta de? amestamos la opción "Ensin Gluten" pa dir mentando aquellos restoranes que contemplen esta opción, que tanto nos solicitáis.



Tienen menú del día. 



Pagamos por tou 65€. Preciu xenial teniendo en cuenta'l tamañu d'esa Ventrisca. 



Lo meyor ye que vaigáis y lo comprobéis vós mesmos. Nós quedamos namoraos de La Talamera.


No hay comentarios

Publicar un comentario