Publicidá

Contact Me

Nombre

Correo electrónico

Mensaje

Hover Setting

default

El Pañol

Direición: Plaza del Carbayu, 1 - Avilés
Teléfonu:  676 545 676



Recomendaciones: Alcachofes rellenes de xamón y foie.


Web: http://elpanol.es/
Facebook: https://www.facebook.com/pages/El-Pañol/
Twitter: [@el_panol]: https://twitter.com/el_panol
Instagram: [@elpanolaviles]: https://www.instagram.com/elpanolaviles


Calidá: 4/5
Preciu: 26€


Comentarios: Nun vos esaxero si llamé unes 6 vegaes estos años pa intentar atopar mesa n'El Pañol, y ... a la séptima foi la vencida. Ye un local pequeñu y que siempres suel tar llenu. Asina qu'acutái con tiempu y vais dame les gracies.


Asitiáu en plena Plaza'l Carbayu, frente a la Ilesia de Santu Tomás de Canterbury (Ilesia Vieya de Sabugo). Les sos ventanes y la so terraza tienen vistes a la Ilesia; ye un auténticu lluxazu mirar pela ventana y atopase un monumentu del S.XIII en frente. Una maravía de la que pocos sitios pueden presumir. Ya ún de los encantos del llocal.


Ye un llocal pequenu, coquetu, fechu pa esfrutar de la so terraza na cai piatonal (tranquilos, pel hibiernu ta abellugada). Dientro, estremase en dos pisos; embaxo zona cuadrada de barra con mini-meses altes pa tomar vinu y/o picar daqué. Nel pisu de riba, una galería preciosa con 4 meses. Estrecha.


Tienen una filosofía per clara (y guapa) de cocina de productu. El llocal ta rexentáu por Gerardo y Paloma. Paloma ye navarra, y tien accesu a productos de primera de la so güerta. Asina que, según van necesitando, únvien-yos los productos frescos que precisen nel tresporte de primera hora de la mañana, pa que siempres tean llistos pa la hora comer.


El so complementu ye Gerardo, un apasionáu del vinu al que-y encanta enseñar y probar. Ello ye que lo meyor que puedes faer ye ponete nes sos manes  pa escoyer un vinu. Nós asina lo fiximos, preguntamos por un vinu blancu asturianu ya indicónos que'l más "fechu" nesi momentu yera La Descarga, Vino blancu de Bodegues Obanca fuera de la DO Cangas.

Cenamos 4 persones. Pidimos 4 platos pa compartir al centru + 3 postres. Y quedamos bien.


Empezamos col Pan de Cristal, Tomate, Aceite y Xamón Ibéricu + Sardina d'Avilés Marinada. Son dos platos en 1, esto ye, el pan de cristal puedes compaxinalo con Xamón Ibéricu o con Sardina o Bocarte. Nós escoyemos sardina. Xamón de primera, pan cruxente, bon aceite (amás, na mesa tienes una botella d'aceite Palacio de los Olivos por si quies añadir daqué en cualquier momentu) y les sardines bien bones.


Cenciellu pero con per bon productu. Empezamos bien.


El platu más conocíu del llocal son les Alcachofes Rellenes de Xamón y Foie. Les alcachofes son de les poques hortolices que nun me suelen prestar, pero éstes taben buenísimes. Bon rellenu de xamón, anque'l toque de foie nun lo notamos malapenes. Y ye que vienen con una capa percima de compota de mazana. Asina que un platu llenu de contrastes, amargos y dulces col toque de xamón.


Per rico.


Pulpu del Pedreru de Puertu Veiga a la Parrilla. Si'l pulpu ta bien fechu, pocu más qu'añadir. Y ésti tenía la testura perfeuta. Vien acompañáu d'un puré de pataca.


Atún Coloráu, Salmorexu y Pataca Llaminada. Bonos llombos d'atún, que se desfaen, per dientro casi crudos, perfeutu, nel so puntu. Vien acompañao de salmorexu y de pimientu caramelizáu pa oldear. Amás d'unes pataques.


Tou perfeutu. Platos cenciellos, con bien bona presentación, y con productu de primera.


Pasamos a los postres, pidimos Torrexa, que gustó.


Tarta de Quesu, con marmiellu de mazana y canela. Tamién nos gustó, amás el toque del marmiellu quéda-y xenial. Distinta.


Xeláu (non caseru) Italianu d'Ablana. Ricu.


Y Arroz con Lleche. Mui ricu tamién.

Ensin cafés, pagamos 104€. Perbón preciu (pensái que siendo 4 comensales, pagamos menos). Amás sorprendiónos lo baratu que tienen el vinu asturianu (que ye'l que más controlamos de precios). Namás 13€ pola Descarga. Per bon entamu p'animar al so consumu.


Allugamientu perfeutu, cocina de productu y vistes impresionantes. ¿Qué más se puede pidir? Gran sitiu El Pañol. Volveremos.


No hay comentarios

Publicar un comentario